نوافذ

رباعيات

 وات مهنتك القول السديد من قمت
وهول ابواتك الجود والكرم والسمته
ما شفناك في الشين والمروبر حمت
مادق النحاس لي حارة واتعسمت
•   
ماك البنكرب يرجع ويفر من داره
وماك البغلبو القول والتكتلو شراره
ود الفي الشتا بتضيع تشبع جاره
بدشر كان نَضَم هيبة وكلام وحراره
كاشف بيتو للملك الفقر  جوع بطنو
 مو  دُلقان ممردغ وهش وهين عطنو
دخر التاتو والحبا والمجود رطنو
 بفرز نضمو صوت ردحي السلاح ويفطنو
صندل دولة الهند المفصل أصلو
 من سيفو البفج في العركة يصعب فصلو
جوّاداً بدرس للكرم في فصلو
دابي الغنقة دنقر منو رأسو رقصلو
وين الفنجري  الماعندو ضيفا همّ
 قطّاع دابر العدو قومتو ساك بي همه
دخر الحوبة يا الفوق علاهم اهم
 يا الجبل النظرتو بتقضي أيّ مهمة
 ووين كفكاف حزن من جات دموعا بهيلة
 أب أيداً تمد الزاد صبورة مهيلة
البملا الدواخل منو كيف وإهيلا
انو قبيلتو جت سمح الخَسايل هيلا
 قدام الكبار بي شين نضم ما فلّت
أجواداً ضبايح الجوهو للجيب قلّت
 أمو كريمة راسية وللبيوت ما فلت
 السوط لي ضهر حوم الهويد بتفلت
وحاشاك ما بتنلام آ لضرا  اللايمنا
 خوجل بوشك آل بي قولك اتختمنا
 شقيش ضقنا لا عايانا لا شتمنا
بالأردب عبّر ما بالربع والتمنه
 حباب الدكر التنعج عشانو الحته
 شدر النيم بقيت الجاعو وين ما حته
 بخت السيروها عليك قطعنا رحتا
 آ ر بي جي أم لفيخ رطن انحمق وانحت
هِن ضحك الأسد وإن كشرت أنيابو
 ما بفرزو الحداو ضحكو وبكاهو بيابو
يا تمساح عشار البفقدوهو شيابو
ما لبس الدلقن ها الفصيلة ثيابو
بعجنبي الجنا الضُّل إن على الناس حرت
 الاسد البرز بين الخلق واتحرت
 النجمة السطع نورا وعلت ما خرت
 ستر العازة كان من شد فقرها اتعرت
سمح تور الخلا البنضم ويجاضي ويخور
 وسمح الصندل الفي البوش بفكو بخور
 سمح عود الوقا البي السوسة مو منخور
 عيش مطمورة لي ضنك الزمن مدخور
 وتسلم يا ابضراع اللي ام دوي بتمشيلا
 تسلم مقنع الكاشفة البقيتا ويشلا
 تسلم يالتكوس وهطة قفاك الشيلة
 يا لقمة قوى الجيعانة بتعشيلا
الدرع البصد رمي أم دوي وتنكيلا
 خشام الحجار تشكيلو ما بشكيلا
 منك شايلة شامخات الحروف دنليلا
 يا الدابي البرش سمو البراري ويكيلا
صوب لي نضال النم عقب با صيلا
 واجدع نمك الحر أبغنوة أصيلة
 ساتر حالي يا توب سترتي وتفصيلا
 في الدم نخوتك بصمة صباع وفصيلة

مقالات ذات صلة

شاهد أيضاً

إغلاق
إغلاق