نوافذ

وندهت ليك

وندهت ليك..
ها بنية هوي أختي الطريق اللتق أطرافو الخطر
ها بنية مالك والدريبات المشلهتة بالفتر
ها بت خبارك والسفر
وندهت ليك..
يا مارقة من شهقة زفير اللحظة والنوم السهر
ها بنية وين عولك إذا كان انتي ما زي البشر
ها بنية ما سر التقارب بين عيونك والقمر
يا بت مسربلة بي عناوين الوتر
لا لاقي ليلك صباح لا لاقي لي فجرك اتر
وندهت ليك.. يا بت مغنية بالصبر
طبالك اتعلم معاك مزيكة الناس الشتر
غنيتي كم، غنيتي كم مكتول معاك
بي توب معاناة الفقر
ها بنية من العين دقر
مالك ملتقة من سنين آخر مزاج وآخر عمر
مالك إذا لونك طواف الكعبة طعمك ما لو مر
مالك إذا ضلك مقيل النار على ضل الجمر
مالك بتشبهي انتماي لي وجعة الناس السمر
وندهت ليك..
صنيت أضان الدنيا من كتر النبيح
شالك جنونك ختّ في قفصك شيوخ آخر ضريح
ها بنية مالك والنويح
قلبي المسكين الجريح
خليهو من ضل الشقا الاتوقا جمرك ويستريح
غنيته بالعربي الفصيح
وسدتها الحس المريح
وندهت ليك وطن وطن
فتشت ليها مع العروق لا ردّ صوته ولا رطن
فرشت ليها مسام قوّاي يا ريته ما عرفت سكن
كتلت صغار حضن الأمان والقوة بي شخص الوهن
ها بنية ادخلي في العروق
اتوسدي المطر البكب لا تخافي من ضي البروق
وانعطني في جوف البحر كان وثرت صوتك حروق
واتوضي من دمع الشروق
وندهت ليك..
وعرضت في سوق الجحيم نسياني يا غالية في غناي
ضُقتك واريت ما ضقت لي طعم طعمك
شحتفتي روحي على الوهم
سليتي سيف قولي البكم
وندهت ليك..
ها بنية ما كافياك عذاب
للبيع هتافك والجرح
للبيع غناي الما فرح
للبيع ولا داير شرح
للبيع بنايا على العذاب
أضخم قصر وأجمل صرح
مالك وكت كوركت ليك انبح صوتك وما نطق
مالك مخيطة حسي فيك قبال لده شفتيو انفتق؟
مالك بتفتحي في جرح طول برا ووجعو اتلتق
مالك تهددي في جرح طول برا ووجعو اتلتق
مالك تهددي في البحر والحوت قصادك بالغرق
شلهتي حال القمرة ليه ضيك ولا مدا لنا ايد
حردتي وش اعيادنا ليه طولنا ما شفنالنا عيد
بتحندكي السما بالمطر بتغازلي في الدم الوريد
طيب خبارك والمسيد؟
طاراتنا قادة جلوده ليه من وين نلاقي جلد جديد؟
يا مهدّدة السما بالشتا
وراجية الشمس تنضم جليد
وندهت ليك..
أنا ما البفارق سكتك قبال يحدد كيف يجيك
وأنا ما البستف اندهاشو وينتظر لحظة مشيك
وأنا ما البطقطق باب زمن عمداً بفرقو من وشيك
وأنا ما البفلق بالوجع حيطة غنا الحزن السميك
طيب إذا سافرتي ليه، جاياني في آخر الدرب
ليه ما استفزيتي المطر ينهي الحزازات بالحرب
ليه ما طلبتي من الشمس تعلن شروقه من الغرب
راجياني ارقص في بكاك يبكيني حسك وانطرب
إذاً إنتي ما بتعرفي لي
سالمي الفجر وأديهو وصفي وخلي منك ليهو ضي
مديني إيدك للقدر نتونسك بالليل شوي
أوعاكي خوفك يندمج في حس هتافاتك علي
جوفي البريد عينيك رقد في حافة الجرح النزف
جرتقتي حسك بالغنا وسيرتي صوتك بالأسف
قلبك سكن آخر مضيق في الجوف ودربك ما انعرف
ممزوجة آخر اختزال بين الشرايين والغرف
ما تحنسي القلب البريدك وتغري بي لحظة صفا
أنا ما البقيف كاتف يدينو على اليقين الانطفأ
وأنا ما البسوقو من الأمان لي صوت هبوب العاصفة
وماني البسد اضنيهو واتوسد قفا
يا بت كفا
مليت فراقك والسفر
مليت أضوق طعمك مرار
واعزف أناشيدك شتر
مليت أقيف عندك شجاع وأنا جوه ماليني الخدر
مليت أشوفك في السما واتشابى ما أعرف خبر
اتوسدي الغنا والوتر
وأوعي المسافات والسهر
ها بت مالك والسفر

مقالات ذات صلة

شاهد أيضاً

إغلاق
إغلاق