نوافذ

واحشني شاهيك باللبن

برادك اللونو السواد
وأنا سود أيامي الزمن
قنانتك العطر البفتق من
يباس عمري الحزن
وأنا يمة مليت العذاب
كوسيلي في عينيك سكن
واحشني شاهيك باللبن
وأنا هسي بتقريف دموع
ما فضلت دمعة عيون
مربوط لسان حال الكلام
غيرك ولا قادر أكون
عينيك مرفأ الانتظار
راحة المسافر في الظنون
زمنا مكلفت بالوجع
مفتوح على شارع الجنون
واحشني شاهيك باللبن
وأنا دايرة أقول ليك جملتين
حطب العواسة حذاري منو
عماكي ما خلا لي عين
قدد مسام روح تعب
ملأ دفتري المن لاكي دين
منعول أبو الما بفقدك ويعرف
زمانو بلاكي شين
واحشني شاهيك باللبن
وأنا دايرة أقول لك يا الحنينة
زي التكنو هواك معاي
يا يمة هداني التعب
فتق حبال صبري وقواي
يا يمة زي ما قلت ليكي
لقيت قمر ليلي وسماي
نوري ووهج ضلمة حروفي
مصب كلامي ومنتهاي
زي التقول ما كان في شي
فكاني في أول طريق
والريد عذاب ما بتمشي
سال الدمع يا يمة رقراق قشقشي
وبعد المتاهات الودار
خليني جنبك أنتشي
وأنا يمة ما خليتلو شي
والله سكنتو الوريد
والله ما طل الصباح
قبال يضخ لي جسمي ريد
والله كل ما يكون حداي
أنا قاعد أحس الدنيا عيد
حزن المسام الشابي في جوف
الحكاوي بكون سعيد
أديني شاهيك باللبن
هسع أقبل أمشي وين
أرجع أقول للناس شنو
وهي الناس كلاما مسيخ وشين
وينو الكتبتو علي دماي
سميتو ضو ليلي الحزين
ولا اللهيب الفي حشاي
اتناسا ويبرد لامتين
ناوليني شاييك باللبن

مقالات ذات صلة

شاهد أيضاً

إغلاق
إغلاق