فوق رأي

دي ما كهربة تقابلو بيها صيف!!

هناء إبراهيم

وكما تقول حبوبة جيرانا ما إن تسمع مسؤولاً يصرح (لا قطوعات) أعلم أن الكهرباء سوف تقطع قبل أن يكمل حديثه..
قطوعات مزعجة بشكل غير طبيعي..
نحن نستمد احتجاجنا على هذه القطوعات المتكررة بالنظر إلى موارد البلاد المائية وإلى هذه الشمس التي (تولد العاقر) وكذلك بصدى حديثكم إبان افتتاح السد.
ما محتجين ساي.. ما جبنا حاجه من عندنا.
فبلد كبلدنا هذه (مفروض لو الكهرباء قطعت نانو ثانية نتخلع ويستقيل الوزير وتقوم الدنيا وما تقعد ذاتو)..
والله جد..
أصلاً أساساً دا ما جو تقطعوا فيهو كهرباء.. هو مع الكهرباء الوضع (مأزوم) والحمد لله.
العلاج بالقطع حل المستضعفين.. يستطيع أي مخلوق ليس له أي علاقة بالكهرباء وإدارتها ودراستها أن يعالج الاستهلاك العالي بي (أقطعوها وبرمجوها واخنقوها)..
نحن بحاجة لحلول متخصصين.
ثم خمن معي كمية الخسائر والحاجات البتبوظ في التلاجة في ظل هذا الوضع الاقتصادي المنكوب!!..
ولاحظوا مساهمتكم العظيمة في تدمير المزاج العام.
خليتو الواحد في حلبة مصارعة مع نفسو.
آآي والله..
بغض النظر عن الناس العيانين… ياخ في كهرباء بقطعوها أيام امتحانات الشهادة؟!
غايتو دي ما كهربة ليكم..
ولا دي كهرباء تقابلو بيها صيف..
أقول قولي هذا كـ شاهد ومشاهد
ودايرة أقول ليكم كهربتو مزاجنا
و……..
جوي عكران
لدواعٍ في بالي

 

مقالات ذات صلة

شاهد أيضاً

إغلاق
إغلاق