نوافذ

متلازمة الشوق..!!

نضال

المتلازمة.. هي مجموعة من الأعراض والعلامات المترابطة مع بعضها البعض والتي تشير إلى حالة مرضية معينة.. بحيث إن الإصابة بالمرض تتزامن مع ظهور أعراض هذا المرض.
ثمة متلازمات تنتج عن اضطراب وراثي أو جيني.. وبعضها الآخر كـ(متلازمة طلاب الطب) يلعب فيه العامل النفسي دور البطل.
إما متلازمتي التي أود أن أكتب عنها اليوم.. فهي متلازمة أخرى.. ذات طعم آخر وأعراض غريبة نوعاً ما.
متلازمة الشوق..
هي مرض عاطفي يصيب أكثر الناس صدقاً والتصاقاً بالآخرين في حالات محددة..

أسباب الإصابة:
خلل وصالي..
فقد ينشأ هذا المرض نتيجة خلل وصالي ما أصاب العاطفة في مقتل سواء كانت هذه العاطفة عشق أو صداقة أو غير ذلك.
والخلل الوصالي نفسه يمكن أن يُقسّم إلى عدة أقسام:
{ خلل وصالي ناتج عن سفر.
{ خلل وصالي ناتج عن انتهاء علاقة ما.
{ خلل وصالي ناتج عن انشغال.
ولكل نوع أعراض معينة وآثار جانبية نفسية واجتماعية وغير ذلك..
المهم في الموضوع.. لما زول يغيب عنك زمن طويل تحس لمن تلاقيه إنك محتاج تضحك شديد وتفرح بي جيّتو وتحتفي بيه شديد.. لكن فجأة قلبك يقبضك.. ووشك يتطوطو ويتصرصر.. وتبدأ تعاتبو على غيابه.. دي اسمها متلازمة الشوق.
لما زول يقول ليك نتلاقى اليوم الفلاني أو الزمن الفلاني.. ويتأخر عليك شوية وتضطر إنت تعكنن عليه باقي يومكم داك.. دي اسمها متلازمة الشوق..
لما زول يقول ليك احتمال أسافر وتبدأ تقفل في وشو أي باب سعادة.. تزهج وتتضايق منو ويغلبك احتمالو.. دي اسمها متلازمة الشوق والسفر..
دي ياها البتخليك حزين وشرّاني في ذات الوقت..
دي ياها البتقص ضهر صبرك وتبدل فرحتك بالقرب خوف من بكرة..
دي ياها البتخليك نفسك تمشي معاه لو قادر..
وتقول ليه بي كل ذرة في روحك..
ما تمشي مني بعيد.. بصوت مليان انكسار.. أو يجاوبك هو…
راحل وحات عينيك.. ومجبور الرحيل..
ده ياهو البمرقك من عميق احتفالك بقربو..
ويلفظك لبر الهمّ من باكر..
العلاج الوحيد من متلازمة الشوق..
يتمثل في الآتي:
{ عدم الرحيل
{ عدم الرحيل
{ عدم الرحيل
….
عدم الرحيل.

مقالات ذات صلة

شاهد أيضاً

إغلاق
إغلاق