نوافذ

وطني ..وفوقو بغني ..

وطني أصالة وطني بسالة وطني مروة. ..
بيهو بنبشر ونهز الضراع بي قوة. ..
ساعة رقصة الدوشكة أم شخيرا دوا
شانو البنسي في أفلام الرعب ما انسوى
….

وطني محل تضيق الواسعة هو البلتمني. ..
بكتم سرو زي مافي حشاهو كتمني. ..
أكان الخوف ضرب قلبي وظلم شتمني. ..
وين غير الوطن عزي وكرامتي وأمني
…..

وطني ذخيرة. ..
وطني السلطة والجاه والأهل والجيرة. ..
ساعة الدنيا يشوي حفى الكتابة هجيرة. ..
ببقى الضل ولحظات الهناء الأخيرة
….
وطني النوبة والنقارة والمردوم. ..
وطني السيرة والعرضة وغنا الحروم. .
وطني الدوكة والدنقابا خيرو يدوم. ..
وفوقو بغني لامن ينشف الحلقوم
…..

وطني قبايلو لا بتنعد لابتنقاس. ..
خلق زاين سماحة تعدد الأجناس. ..
وحات اسم الله ما محسوبة من الناس
اكان لي حارة أرضي بحنسوني حناس.
…..

مابقيد رحيح نمك ورق كراس. ..
قلمي أب ركزة من جيهة غناك تراس
وطناً رحمو ماجابت برا الفراس. .
على ذكرو بقيف شعر الجسوم والراس
……

غير أهلو البقيتو الواقعة. ..
أراضي غنية في جوفا المعادن ناقعة. ..
سماحو وكت مقالدة البرق والصاقعة
يومو جت الشمس ليهو احتراما فاقعة
…..

فوقو بنم وفوقو بغني فوقو بدوبي
مادام ريدو في الشارع سترتي وتوبي. ..
أنا مليانة بالعز والشجاعة جيوبي
مادام أصلي قبال عربي زنجي ونوبي
……

وطني الغيرو مابحرك مشاعري مكان. ..
وفقر الناس على خيرو وخزاينو مكان
وطني الليهو أخيار البشر سكان…
ده درا مابشيل زي نوعو رف دكان
……

البلد العلي الهم والمصايب صابر
قلمو ولا بتتم ناقصة مدادو محابر. ..
اللي خاطر الموجوعة دايما جابر. .
ما بتفرقنا من ريدو وغرامو مقابر..

 

مقالات ذات صلة

شاهد أيضاً

إغلاق
إغلاق