فوق رأي

هاشتاق مؤجل

هناء إبراهيم

}المشكلة مش في إنو الناس اقتنعت تماماً إنو الجهات الرسمية ما عندها دور ومسؤولية والتزام تجاه المشاكل الصحية التي تصيب البلاد.. المشكلة إنو الجهات الرسمية عندها مشاكل صحية وفقر دم عجيب..
نسأل الله السلامة والإحساس..
……
}الأسلوب ودرجة الصوت هما الجزء الأهم في الكلام وطرح الآراء.. يعني لو قلنا رأي كويس بأسلوب زفت ح تبوظ الطبخة كلها..
تقبل الناس للرأي والرأي الآخر يعتمد نفسياً على الأسلوب..
والله جد..
….
}من المشاكل الـ لسه (ليوم الليلة) بعاني منها عدد كبير من الأطفال والشباب.. إنو أهلك عايزنك تحلم الأحلام الـ هم عايزنها ليك.. وتحضر البرامج الـ هم عايزنك تتابعها .. وتقرأ الكلية الـ هم عايزين يقروك ليها.. وتصاحب الأصدقاء الـ هم عايزين يختاروهم ليك.. وتمارس الهوايات الـ هم بفصلوها ليك.. وتشتغل الشغلة الـ هم شايفنها فيها.. ودا كلام ما ممكن وما منطقي ومهلك نفسياً..
والله جد…
……
}زمان كنت لما ترسل شافع الدكان بتخاف ينوم بالباقي.. هسه بتخاف من الـ ممكن يبقى عليهو
والله جد..
…..
}تختلف خطوط الطيران وطراز الطائرة وطاقمها ورقم الرحلة بينما تظل طريقة قراءة الإرشادات ثابتة عبر الزمان بذات نبرة الصوت وتضاريس النطق.
حتى القنوات والإذاعات وخوفاً من أي خرق في الأداء، تستعين بأهل المطار لقراءة حركة الطيران.
التقول لكنة السحاب دي منزلة من السماء.
تمنيت لو أن العمود مسموع لـ أقلد هذه الطريقة على طريقتي.
القطرية رحلة رقم (104) المتجه إلى الدوحة قيام الساعة هسه وصول الساعة بعدين..
بعدين إنت دا

مقالات ذات صلة

شاهد أيضاً

إغلاق
إغلاق